Paggawa ng mga makabuluhang batas para sa munisipalidad ang pangunahing gawain ng Sangguniang Bayan (SB) ng Angat. Ito ang responsable sa pagpapasa ng mga ordinansa at resolusyon para sa bayan na tutugon sa pangangailangan ng sitwasyon at akma sa hamon ng panahon. Bago ipatupad ang mga ordinansa at resolusyong ito ay masusi itong tinatalakay ng SB sa mga regular na sesyon at binubusisi ang bawat anggulo upang masigurong makakatulong ito sa pag-aangat ng kapakanan at interes ng mga mamamayan. Ang kanilang kapangyarihan ay base pa rin sa Local Government Code na aprubado ng Kongreso noon pang 1991.