THIS BAND at NOBITA, Tampok sa Grand Concert ng GulayAngat Festival 2025

Angat, Bulacan — Isang gabi ng musika, saya, at pagdiriwang ang naghihintay sa mga Angateño sa darating na Oktubre 17, 2025, 6:00 PM sa New Angat Municipal Grounds, sa inaabangang GulayAngat Festival Grand Concert!

Tampok sa espesyal na pagtatanghal ang sikat na OPM band na NOBITA, kasama ang kilalang THIS BAND, na maghahatid ng mga awiting tiyak na tatagos sa puso at bubuo sa kwento ng musika ng bawat Angateño.

Gabi ng Musika at Pagkakaisa

Ang naturang concert ay isa sa mga highlight events ng GulayAngat Festival 2025, na may temang “Sulong para sa Eko-Kultural na Pag-Angat.”

Layunin ng aktibidad na pagsamahin ang musika at kultura bilang simbolo ng pagkakaisa at pag-angat ng bayan. Inaasahan ang libo-libong manonood mula sa iba’t ibang barangay upang saksihan ang gabi ng tugtugan, kantahan, at kasiyahan.

Hatid ng Pamahalaang Bayan ng Angat

Ang concert na ito ay inihandog ng Pamahalaang Bayan ng Angat, sa pamumuno ni Hon. Reynante “Jowar” S. Bautista, Punong Bayan, katuwang ang Municipal Tourism Office, bilang pasasalamat sa mamamayang patuloy na sumusuporta sa mga programang pangkultura at pangkomunidad ng bayan.

“Tugtugan, kasiyahan, at pagkakaisa — lahat ng ito, para sa mas masiglang GulayAngat Festival 2025!”