Seguridad sa Piitan, Higit na Pinahigpit: ‘Oplan Galugad,’ Isinagawa ng Angat PNP sa Custodial Facility

Upang matiyak ang kaayusan at kaligtasan sa loob ng piitan, matagumpay na naisagawa ng Angat Municipal Police Station (MPS) ang isang Oplan Galugad nitong ika-10 ng Pebrero, 2026.

Sa ganap na ika-9:00 ng umaga, pinangunahan ni Pat Murphy T. Caoile, Human Rights PNCO, ang masusing inspeksyon sa Angat MPS Custodial Facility na matatagpuan sa Brgy. San Roque. Ang naturang aktibidad ay isinagawa sa ilalim ng direktiba ni PCpt. Jayson M. Viola, Officer-in-Charge (OIC).

Pangunahing layunin ng operasyon na masigurong walang anumang uri ng kontrabando, gaya ng iligal na droga, nakamamatay na armas, at iba pang ipinagbabawal na kagamitan ang naisusulit o naitatago sa loob ng pasilidad. Ang hakbang na ito ay bahagi ng preventive measures ng pulisya upang maiwasan ang anumang gulo, tangkang pagtakas, o hindi inaasahang insidente sa loob ng selda.

Binigyang-diin ng Angat MPS na ang regular na pagsasagawa ng Oplan Galugad ay hindi lamang para sa seguridad ng mga kapulisan, kundi maging para sa kaligtasan na rin ng mga Persons Deprived of Liberty (PDL). Tinitiyak ng himpilan na ang bawat inspeksyon ay isinasagawa nang maayos at may mataas na paggalang sa karapatang pantao.