Seguridad at Tulong-Medikal sa Fun Run, tiniyak ng MDRRMO at Angat Rescue Team

Nakalagay na sa full deployment ang mga tauhan ng Municipal Disaster Risk Reduction and Management Office (MDRRMO) at Angat Rescue Team, katuwang ang Angat Municipal Health Office (MHO), upang magbigay ng paunang tulong-medikal at umagapay sa seguridad ng mga tatakbo sa ginanap na Fun Run.

Nakatutok ang mga rescue at medical team sa kahabaan ng ruta upang mabilis na makatugon sa anumang pangkagipitang pangangailangan ng mga kalahok at mamamayan.

Nagpaalala rin ang mga awtoridad sa lahat ng mga tumatakbo na panatilihing sapat ang inuming tubig (hydrated) at mag-ingat habang nasa kalsada upang maiwasan ang anumang aksidente o pagkahilo.

Ayon sa MDRRMO, ang mabilisang pagtugon at pag-agapay na ito ay bahagi ng patuloy na komitment ng Pamahalaang Bayan ng Angat na tiyakin ang kaligtasan at kaayusan sa bawat pampublikong aktibidad sa bayan.