Responsableng Pagpapamilya, Binigyang-diin sa Isinagawang ‘Usapang Buntis’ sa Barangay Donacion

Upang higit na mapangalagaan ang kalusugan ng mga ina at matiyak ang magandang kinabukasan ng bawat pamilyang Angateño, matagumpay na idinaos ng Angat Rural Health Unit (RHU) ang “Usapang Buntis: Family Planning” sa Donacion Health Station.

Ang nasabing talakayan ay nakatuon sa pagbibigay ng sapat na kaalaman sa mga nagdadalang-tao tungkol sa kahalagahan ng agwat ng panganganak at ang mga benepisyo ng responsableng pagpaplano ng pamilya. Layunin ng programang ito na bigyan ng sapat na gabay at lakas ng loob ang mga ina upang makagawa ng mga tamang desisyon na makabubuti sa kanilang pisikal na kalusugan at sa aspetong pang-ekonomiya ng kanilang pahanayan.

Ayon sa kinatawan ng RHU Angat, ang pagiging "maalam" ay ang unang hakbang tungo sa mas ligtas na pagbubuntis at panganganak. Sa pamamagitan ng family planning, mas nabibigyan ng sapat na oras at atensyon ang bawat bata, habang pinoprotektahan ang kalusugan ng ina mula sa mga panganib ng magkakasunod na pagbubuntis.

Ang inisyatibong ito ay bahagi ng mas malawak na kampanya ng Pamahalaang Bayan ng Angat na isulong ang responsableng pagpapamilya para sa isang mas malusog at matatag na komunidad.