Residente at Opisyal ng Barangay Niugan Nagtulong-tulong sa Paglilinis

Ipinagpatuloy ng Sangguniang Barangay ng Niugan ang kanilang lingguhang programa sa kalinisan matapos nitong matagumpay na idaos ang Weekly Clean-Up Drive ngayong Sabado, Agosto 22, 2026.

Nagtulong-tulong ang mga opisyal, kawani, at mga residente sa paglilinis ng mga pampublikong pasilidad at kalsada sa paligid ng barangay.

Naging pangunahing layunin ng aktibidad ang pagtatapon ng mga nakaimbak na tubig at basurang pwedeng paitlogan ng mga lamok upang maiwasan ang pagdami ng kaso ng dengue. Bukod dito, binuksan at nilinis din ang mga kanal at daluyan ng tubig upang masiguro ang maayos na agos nito at maiwasan ang pagbaha sa komunidad.

Muling nagpaalala ang pamunuan ng Barangay Niugan sa lahat ng mga residente na panatilihin ang regular na paglilinis sa kani-kanilang mga bakuran para sa kalusugan at kaligtasan ng buong pamayanan.