Pulisya ng Angat, Nagbabala Laban sa Price Manipulation sa Ilalim ng Bagong Batas na RA 12022

Binigyang-diin ng Pambansang Pulisya sa bayan ng Angat ang kahalagahan ng bagong lagdang batas, ang Republic Act 12022 o ang Anti-Agricultural Economic Sabotage Act. Ang batas na ito ay naglalayong tuldukan ang mga ilegal na aktibidad sa sektor ng agrikultura na nagpapahirap sa mga lokal na magsasaka at nagpapataas sa presyo ng bilihin.

Ang batas na ito ay itinuturing na "strong stand" ng pamahalaan laban sa mga mapagsamantalang negosyante. Sa ilalim nito, ang smuggling (pagpupuslit), hoarding (pagtatago ng produkto), profiteering (labis na pagpapatong ng presyo), at operasyon ng kartel sa mga produktong agrikultural at pangisdaan ay klasipikado na ngayon bilang mga gawaing Economic Sabotage—isa sa pinakamabigat na krimen sa Pilipinas.

Ang bayan ng Angat ay may malawak na sektor ng agrikultura. Ang mga ilegal na gawaing ito ang dahilan ng biglaang pagtaas ng presyo ng pagkain, pagkalugi ng mga lokal na magsasaka, at banta sa seguridad ng pagkain sa bansa. Layunin ng batas na mapanatili ang patas na presyo sa mga palengke,siguraduhin ang katatagan ng suplay ng pagkain at protektahan ang kabuhayan ng mga lokal na prodyuser.

Ang Pulisya ng Angat ay kaisa ng pamahalaan sa pagbabantay upang masiguro na ang bawat pamilyang Pilipino ay may akses sa abot-kaya at patas na kinakalakal na pagkain. Hinihikayat ang publiko na i-report ang anumang kahina-hinalang aktibidad ng hoarding o smuggling sa inyong lugar.