PSA BREQS Outlet, Bukas para sa mga Kinakailangang Sibil na Dokumento

Inanyayahan ng Angat Municipal Civil Registry Office ang mga mamamayan na nagnanais kumuha ng kopya ng kanilang mga dokumento mula sa Philippine Statistics Authority (PSA) na magtungo sa kanilang tanggapan sa loob ng Angat Municipal Hall.

Sa pamamagitan ng PSA Batch Request Entry System (BREQS) Outlet ng munisipyo, mas pinadali at pinabilis na ang paghiling ng mga batayang dokumento tulad ng Birth Certificate, Marriage Certificate, Death Certificate, at Certificate of No Marriage Record (CENOMAR).

Ayon sa pampublikong patalastas ng tanggapan, ang pagproseso ng mga dokumento sa pamamagitan ng PSA BREQS ay nangangailangan ng dalawang linggong pag-aasikaso. Para sa mga nagsumite ng kahilingan mula Oktubre 1 hanggang sa takdang oras na 3:00 PM ng Oktubre 7, 2026, nakatakda ang opisyal na release date ng mga dokumento sa Oktubre 20, 2026.

Ipinapaalala rin ng tanggapan na kinakailangang makapagbayad muna bago maiproseso ang anumang kahilingan alinsunod sa patakarang "Strictly: No Payment, No Process." Bukas ang Angat Municipal Civil Registry Office mula Lunes hanggang Biyernes, 8:00 AM hanggang 5:00 PM.