PNP Angat, Tiniyak ang Maximum Tolerance sa Lahat ng Pagkakataon

Sa gitna ng iba't ibang kaganapan sa bansa, naglabas ng opisyal na pahayag ang Angat Municipal Police Station (MPS) upang bigyang-diin ang kanilang pangako sa pagprotekta sa mga batayang karapatan ng bawat mamamayan.

Tiniyak ng Kapulisan ng Angat na mananatili silang katuwang ng publiko sa pagsasagawa ng kanilang karapatan sa malayang pagpapahayag. Ayon sa himpilan, ang bawat Angateño ay may kalayaang maglabas ng saloobin, at tungkulin ng PNP na siguraduhing ligtas ang kapaligiran para sa lahat.

Kasabay nito, ipinaliwanag ng PNP Angat na patuloy nilang ipatutupad ang kaukulang security measures upang mapanatili ang kaayusan sa komunidad. Binigyang-diin ng pamunuan na paiiralin ang maximum tolerance sa lahat ng pagkakataon, na nangangahulugang ang mga operatiba ay magsasagawa ng disiplina at pasensya habang tinitiyak na walang kaguluhan o paglabag sa batas na nagaganap.