PNP Angat, Nagsagawa ng Madaling-Araw na ‘Police Presence’ sa Brgy. Sta. Lucia

Sa ilalim ng direktang pangangasiwa ni PMAJ JOEL M. ALBA, Chief of Police ng Angat Municipal Police Station (MPS), matagumpay na naisagawa ang isang operasyon para sa Police Presence sa kahabaan ng Angat River, Brgy. Sta. Lucia, ngayong Martes, ika-31 ng Marso, 2026.

Nagsimula ang pagpapatrolya sa ganap na alas-2:40 ng madaling-araw kung saan naging aktibo ang mga elemento ng istasyon sa pagbabantay sa nasabing lugar. Layunin ng aktibidad na ito na higit pang patatagin ang ugnayan sa pagitan ng kapulisan at ng komunidad, partikular na ang pakikipag-ugnayan sa mga opisyales ng barangay.

Sa nasabing operasyon, tinalakay ang mga mahahalagang usapin patungkol sa pagpapanatili ng kapayapaan at kaayusan (Peace and Order), mga hakbang sa pag-iwas sa krimen (Crime Prevention), at iba pang mga alalahanin ng mga residente sa loob ng kanilang nasasakupan.

Ayon sa pamunuan ng Angat MPS, ang ganitong mga hakbang ay nagsisilbing pagkakataon upang mas mapalakas ang kooperasyon ng Philippine National Police at ng mga lokal na lider sa barangay. Ito ay upang matiyak ang kaligtasan at seguridad ng publiko, lalo na sa mga pampublikong lugar at pasyalan na madalas puntahan ng mga tao.