PNP Angat, Naglabas ng Health Advisory Laban sa Nipah Virus; Publiko, Pinag-iingat

Bilang bahagi ng pagpapanatili ng pangkalahatang kaligtasan, naglabas ng mahalagang paalala ang Angat Municipal Police Station (PNP Angat), alinsunod sa mga alituntunin ng Department of Health (DOH), hinggil sa banta ng Nipah Virus (NiV).

Layunin ng anunsyong ito na bigyan ng sapat na kaalaman ang mga mamamayang Angateño tungkol sa katangian ng nasabing sakit. Ang Nipah Virus ay isang zoonotic virus na maaaring maipasa mula sa mga hayop (gaya ng paniki at baboy) tungo sa tao, o kaya naman ay sa pamamagitan ng kontaminadong pagkain at direktang kontak sa taong infected nito.

Ayon sa PNP Angat, ang pagiging maalam sa mga sintomas gaya ng lagnat, sakit ng ulo, ubo, at sa malalang kaso ay pagkalito o encephalitis, ay krusyal para sa maagang pagtugon.

Binigyang-diin ng himpilan na ang disiplina sa sanitasyon at pag-iwas sa pagkain ng mga prutas na may bakas ng kagat ng hayop ay ilan lamang sa mga paraan upang maprotektahan ang komunidad.

Nanawagan ang kapulisan na manatiling kalmado ngunit mapagmatyag, at sumunod lamang sa mga opisyal na ulat mula sa DOH upang maiwasan ang pagkalat ng maling impormasyon na maaaring magdulot ng takot sa publiko.