PNP Angat, Mahigpit na Ipatutupad ang Batas Laban sa 'Noise Nuisance' at 'Noise Pollution'

Upang matiyak ang katahimikan at kaayusan sa komunidad, inanunsyo ng Angat Municipal Police Station (PNP Angat) ang mas pinalakas na kampanya at mahigpit na pagpapatupad ng mga batas laban sa Noise Nuisance at Noise Pollution sa buong bayan.

Ang hakbang na ito ay tugon sa mga reklamo hinggil sa labis na ingay na nakakaabala sa pahinga, kalusugan, at kapayapaan ng mga residente, lalo na sa mga oras ng gabi.

Nagbabala ang pamunuan ng PNP Angat na ang mga lalabag ay maaaring patawan ng kaukulang multa o kumpiskasyon ng mga kagamitang nagdudulot ng ingay. Layunin ng operasyong ito na itaguyod ang disiplina at respeto sa karapatan ng bawat isa na magkaroon ng tahimik na kapaligiran.

Hinihikayat ang mga mamamayan na makipagtulungan at iulat sa pinakamalapit na himpilan ng pulisya o sa kanilang mga barangay ang anumang insidente ng labis na ingay sa kanilang lugar.