PNP Angat at DOE, Nagkaisa sa Pagpapatupad ng Anti-Hoarding at Fuel Dispensing Guidelines

Upang matiyak ang patas na distribusyon ng petrolyo sa gitna ng mga hamon sa suplay, pormal nang ipinatutupad ng Angat Municipal Police Station (MPS) ang mga mahigpit na panuntunan mula sa Department of Energy (DOE) hinggil sa Anti-Hoarding at Fuel Dispensing Measures.

Ang hakbang na ito ay tugon sa direktiba ng pambansang pamahalaan na pigilan ang anumang uri ng ilegal na pag-iimbak o stockpiling ng gasolina at diesel. Layunin din nito na maiwasan ang artificial shortage na madalas idinudulot ng panic buying at hindi makatwirang pagbili ng maramihang suplay na labas sa itinakdang limitasyon.

Sa ilalim ng mga bagong guidelines, binabantayan ng PNP Angat ang mga gasolinahan sa bayan upang masiguro na sumusunod ang mga ito sa tamang paraan ng pagbebenta ng petrolyo. Kabilang dito ang pagbabawal sa paglalagay ng gasolina sa mga hindi awtorisadong lalagyan o containers na maaaring magdulot ng panganib o magamit sa hoarding.

Ayon sa pamunuan ng Angat MPS, ang mga hakbang na ito ay mahalaga upang mapangalagaan ang interes ng bawat motorista at tsuper sa bayan. Nagbabala ang kapulisan na ang sinumang mahuhuling lumalabag sa mga panuntunang ito ay haharap sa kaukulang parusa sa ilalim ng batas.