Pamahalaang Bayan, Sinalubong ang Bagong Pamunuan ng Angat-DRT Teachers & Employees Association

Upang mas patatagin ang sektor ng edukasyon at itaguyod ang kapakanan ng mga pangunahing tagahubog ng kaisipan ng kabataan, pormal nang nanumpa sa tungkulin ang mga bagong halal na opisyal ng Angat DRT Municipal Teachers & Employees Association Incorporated para sa terminong 2026–2027.

Ang solemne na Oath Taking Ceremony ay personal na pinangunahan ni Punong Bayan Igg. Reynante S. Bautista sa loob ng tanggapan ng Pamahalaang Bayan.

Sa naging takbo ng aktibidad, binigyang-diin ang kahalagahan ng patuloy na pagkakaisa at pagpapalakas ng samahan ng mga guro sa bayan ng Angat at kalapit na bayan ng Donya Remedios Trinidad (DRT). Ang bagong pamunuan ay inaasahang magiging katuwang ng pamahalaan sa pagbalangkas ng mga programa na higit pang mapapabuti ang kapakanan, karapatan, at propesyonal na pag-unlad ng bawat kasapi ng asosasyon.

Mula sa apat na sulok ng silid-aralan hanggang sa pakikihalubilo sa malawak na komunidad, nananatiling iisa at buo ang hangarin ng mga guro—ang makapaghatid ng de-kalidad na edukasyon at magsilbing matibay na gabay sa mga kabataang Angateño.

Ipinahayag ng administrasyong Bautista ang buong suporta nito sa bagong pamunuan, sabay ang pagkilala sa sakripisyo ng mga guro at kawani na nagsisilbing pundasyon ng isang matalinong pamayanan.

Sa pamamagitan ng bagong pamunuang ito, tinitiyak ng LGU Angat na may boses at katuwang ang mga bayani ng akademya tungo sa isang mas maunlad, inklusibo, at modernong sistema ng edukasyon sa buong bayan.