Pamahalaang Bayan ng Angat, Naging Punong-Abala sa ‘DILG Konek: The Provincial Team Conference’

Upang mas mapataas ang kalidad ng lokal na pamamahala, isinagawa ang "DILG Konek: The Provincial Team Conference" sa New Municipal Conference Hall ng Bayan ng Angat.

Ang nasabing komperensya ay inisyatiba ng DILG Bulacan, sa pangunguna ni Provincial Director Myrvi Apostol-Fabia, CESO V. Layunin nito na paigtingin ang kakayahan ng mga Local Government Units (LGU) sa lalawigan sa pamamagitan ng mas mahigpit na monitoring, malinaw na assessment strategies, at maayos na paghahanda para sa mga performance audits.

Sa pamamagitan ng mga technical discussions at status reports, tinalakay ang mga paraan upang matiyak ang mataas na antas ng compliance sa mga pambansang pamantayan. Binigyang-diin ng DILG ang kahalagahan ng transparency at accountability upang makapagbigay ng mas epektibong serbisyong publiko.

Nagpahayag naman ng buong suporta si Punong Bayan Igg. Reynante S. Bautista, kasama ang mga miyembro ng Sangguniang Bayan, sa mga programa ng DILG. Ayon sa alkalde, ang pakikibahagi ng Angat sa ganitong mga pagsasanay ay patunay ng kanilang seryosong hangarin na patuloy na iangat ang antas ng pamamahala para sa kapakinabangan ng bawat mamamayang Angateño.