‘Nutri-Steps 2026’ Eco-Walk, Ilulunsad ng Pamahalaang Bayan ng Angat para sa mga Bata

Isang makabuluhang hakbang para sa kalusugan at kalikasan ang nakatakdang ganapin sa bayan matapos opisyal na ianunsyo ng Municipal Nutrition Office ang pagkakasa ng NUTRI-STEPS 2026 ngayong darating na Hulyo 11, 2026 (Sabado).

Ang aktibidad na ito ay isang fund-raising eco-walk na naglalayong pondohan ang 90-Day Supplemental Feeding Program para sa mga piling batang nakararanas ng kakulangan sa nutrisyon o malnourished children sa buong bayan. Ito ay bahagi pa rin ng pagdiriwang ng National Nutrition Month na may temang "Nutrisyon at Kalikasan, Ating Pangalagaan."

Inaanyayahan ang buong pamilya, magkakaibigan, magkakatrabaho, at lahat ng mga Angateño na makiisa sa iskedyul na ito:

• Call Time & Huling Rehistrasyon: 5:30 ng umaga

• Assembly Area: Malapit sa Entrance ng New Angat Municipal Building Pathway

• Simula ng Eco-Walk: 6:00 ng umaga

• Programa at AM Snacks: 7:00 ng umaga

• Registration Fee: ₱150.00

Upang mas maging masaya ang aktibidad, magkakaroon ng Eco-Costume Challenge. Hinihimok ang mga kalahok na magsuot ng malikhaing costume na gawa sa mga recycled o eco-friendly na materyales na sumasalamin sa tema ng nutrisyon at pangangalaga sa kalikasan.

Dahil ito ay isang eco-walk, mahigpit na ipatutupad ang pangangalaga sa kalikasan sa pamamagitan ng mga sumusunod na alituntunin:

• Bring Your Own Bottle (BYOB): Magdala ng sariling tumbler o botelya ng tubig. Maglalagay ang pamunuan ng mga water refilling station sa bawat kilometro ng ruta upang iwasan ang paggamit ng single-use plastic.

• Panatilihing Malinis ang Ruta: Siguraduhing walang mahuhulog o maiiwang bahagi ng costume o anumang basura sa daan habang naglalakad.

Para sa mga interesadong sumali, maaari nang magpa-rehistro sa mga Barangay Nutrition Scholars (BNS) o Lingkod Lingap sa Nayon (LLN) sa inyong kani-kanilang barangay.

Sama-sama nating ipakita na sa bawat hakbang na ating gagawin ngayong Hulyo 11, may isang batang Angateño ang ating natutulungang magkaroon ng mas malusog na kinabukasan!