MTO Angat, Nagsagawa ng Inspection and Calibration sa mga Gasolinahan sa Bayan

Isinagawa ng mga kawani ng Municipal Treasurer's Office (MTO) ng Pamahalaang Bayan ng Angat ang opisyal na calibration at inspection ng mga dispensing pumps sa iba't ibang istasyon ng langis at gasolinahan sa buong bayan ngayong taong 2026.

Ayon sa MTO Angat, ang regular na gawaing ito ay naglalayong tiyakin na tama at tumpak ang bawat litrong ikinakarga sa mga sasakyan ng mga mamamayan, habang pinoprotektahan ang karapatan at kapakanan ng bawat mamimiling Angatenyo.

Pinangangalagaan din ng nasabing hakbang ang pagsunod ng mga lokal na fuel stations sa mga tamang probisyon, pamantayan, at regulasyong itinatakda ng batas hinggil sa kalakalan at pagsusukat.

Pinapayuhan ng MTO at ng lokal na pamahalaan ang publiko na manatiling alerto at sigurado sa bawat pagpapakarga. Para sa mga katanungan, obserbasyon, o ulat ukol sa sukat ng mga gasolinahan, maaaring makipag-ugnayan nang direkta sa tanggapan ng Municipal Treasurer's Office.