Mga Gradweyt na Benepisyaryo ng 4Ps, Pinarangalan; Pagsasanay sa Paggawa ng Pabango, Ipinagkaloob

Isang malaking pagpupugay ang iginawad sa mga resilient na pamilyang Pilipino matapos matagumpay na idaos ang "Pugay Tagumpay 2026" sa Conference Hall ng New Municipal Building ngayong Martes, Hunyo 23, 2026.

Ang aktibidad ay ang opisyal na seremonya ng pagkilala sa mga benepisyaryo ng Pantawid Pamilyang Pilipino Program (4Ps) na opisyal nang nakatawid mula sa kahirapan (self-sufficient) at handa nang magsimula ng bagong yugto ng kanilang buhay nang may sapat na kakayahan.

Ang makasaysayang programang ito ay naisakatuparan sa pamamagitan ng matatag na ugnayan at pagtutulungan ng Department of Social Welfare and Development (DSWD) at ng Lokal na Pamahalaan, na kapwa naglalayong maghatid ng serbisyong diretso sa tao at patuloy na umaalalay sa pag-unlad ng bawat pamilyang nasasakupan.

Upang masiguro na may sapat na sandata ang mga pamilya sa kanilang pag-unlad, naging tampok sa programa ang Skills Training in Perfume Making. Ang espesyal na pagsasanay na ito ay naglalayong maghatid ng bagong kaalaman at praktikal na kasanayan na magagamit ng mga kababayan bilang sustainable o pangmatagalang pangkabuhayan at karagdagang kita.

Taos-pusong binati ng pamunuan ang mga pamilyang 4Ps na nagpakita ng pambihirang katatagan, sipag, at dedikasyon na mapabuti ang kanilang pamumuhay. Ang kanilang tagumpay ay hindi lamang tagumpay ng kanilang sariling sambahayan, kundi isang malaking inspirasyon para sa buong komunidad na magsumikap patungo sa mas maayos na kinabukasan.