MDRRMO Angat, Nagsagawa ng Field Validation sa mga Proyekto sa Barangay

Upang matiyak ang kalidad at mabilis na implementasyon ng mga proyektong pang-kaligtasan, isinagawa ng Angat Municipal Disaster Risk Reduction and Management Office (MDRRMO) ang isang serye ng Project Validation sa iba’t ibang barangay.

Sa ilalim ng temang “Ramdam na Pagkalinga - Protektado ang Bawat Pamilya,” personal na pinangunahan ni G. Carlos R. Rivera Jr., MDRRM Officer, ang Field Validation Team sa mga barangay ng Laog, Niugan, at Sulucan. Layunin ng pagbisitang ito na suriin ang estado ng mga naka-planong proyekto para sa buwan ng Marso at Abril na may kinalaman sa disaster preparedness at mitigation.

Naging matagumpay ang konsultasyon sa tulong nina Igg. Paterno Manayao (Brgy. Laog), Igg. Roberto Maximo (Brgy. Niugan), at Igg. Eric Cruz (Brgy. Sulucan). Ang epektibong komunikasyon sa pagitan ng MDRRMO at ng mga lokal na lider ng barangay ay mahalaga upang masiguro na ang bawat proyekto ay tumutugon sa aktwal na pangangailangan ng komunidad laban sa mga banta ng sakuna.

Ang hakbang na ito ay bahagi ng patuloy na pagsisikap ng Pamahalaang Bayan ng Angat na maging handa at matatag ang bawat barangay, tungo sa isang mas ligtas at protektadong pamayanan para sa lahat ng Angateño.