MDRRMO Angat at Barangay San Roque, Nagkaisa para sa Community Risk Assessment 2026

Sa layuning mas mapatibay ang kahandaan ng bawat komunidad, nagsagawa ng isang mahalagang pagpupulong ang Municipal Disaster Risk Reduction and Management Office (MDRRMO) katuwang ang Barangay Disaster Risk Reduction and Management Committee (BDRRMC) ng San Roque nitong nakaraang linggo.

Ang nasabing pagtitipon ay isinagawa sa ilalim ng pamumuno ni G. Carlos R. Rivera Jr., MGDH I (MDRRMO), bilang tugon sa imbitasyon ng lokal na konseho ng barangay. Pinangunahan naman ni Igg. Nerio Santiago Valdesco ang sesyon, kung saan binigyang-diin niya ang kahalagahan ng pagkakaroon ng isang ligtas at handang komunidad laban sa anumang sakuna.

Naging sentro ng talakayan ang isasagawang Community Risk Assessment (CRA) ngayong taong 2026. Sa paliwanag ni G. Clarence Emmanuel B. Alba, tinalakay ang kahalagahan ng CRA sa pagtukoy ng mga panganib sa loob ng barangay at ang pagbuo ng mga estratehiya upang maiwasan ang malubhang epekto nito. Ayon sa MDRRMO, ang CRA ay isang pundasyon upang masigurong ang mga programa para sa kaligtasan ay angkop sa pangangailangan ng mga residente.

Bilang bahagi ng suporta sa kahandaan ng lokal na pamahalaan, nagpaabot din ang departamento sa pangunguna ni G. Rivera ng mga First Aid Kits para sa Barangay San Roque. Ang mga kagamitang ito ay naglalayong magbigay ng agarang tugon sa mga emergency at insidente sa loob ng kanilang nasasakupan.