Lokal na Pamahalaan ng Angat, Pinalawak ang Koordinasyon sa Pribadong Kumpanya para sa Ligtas at Handang Komunidad

Angat, Bulacan — Patuloy na pinatitibay ng Pamahalaang Bayan ng Angat sa pamamagitan ng Municipal Disaster Risk Reduction and Management Office (MDRRMO) ang pakikipag-ugnayan nito sa mga pribadong sektor upang mapalakas ang kakayahan ng mamamayan sa pagtugon sa mga emergency.

Kamakailan ay nagsagawa ang MDRRMO ng apat na araw na pagsasanay sa mga tauhan ng Genetron International Marketing ukol sa Standard First Aid and Basic Life Support with Automated External Defibrillator (SFAT-BLS with AED), na ginanap mula Setyembre 16 hanggang Setyembre 19, 2025.

Apat na Araw ng Pagsasanay sa First Aid at Life Support

Sa unang araw, isinagawa ang orientation at pre-test upang alamin ang kasalukuyang kaalaman ng mga kalahok tungkol sa pagbibigay ng paunang lunas. Pinangunahan nina Ma. Lourdes Alborida (LDRRMO III) at Maria Lilibeth F. Trinidad ang talakayan hinggil sa mga batayang konsepto ng First Aid at Basic Life Support, kabilang ang Cardiopulmonary Resuscitation (CPR) gamit ang AED, na sinundan ng skills examination.

Ikaalawa at ikatlong araw naman, pinangunahan ni G. Steven Carlo L. Atienza ang pagsasanay sa bandaging techniques, splinting, at moving and lifting ng mga pasyente.

Sa huling araw, nagsagawa ng simulation exercise ang mga kalahok bilang bahagi ng pagtataya sa kanilang natutunan.

Pagtatapos at Mensahe ng MDRRMO

Nagtapos ang programa sa isang graduation ceremony kung saan tumanggap ng sertipiko ang mga kalahok bilang pagkilala sa kanilang matagumpay na pagsasanay.

Sa kanyang mensahe, binigyang-diin ni G. Carlos R. Rivera Jr., Municipal Government Department Head I (MDRRMO), ang kahalagahan ng pagkakaroon ng sapat na kaalaman sa paunang lunas at life-saving response lalo na sa mga pribadong kumpanya.

Aniya, “Isang malaking hakbang ang ganitong uri ng kolaborasyon sa pagitan ng lokal na pamahalaan at ng pribadong sektor. Patunay ito ng tiwala at pagkakaisa tungo sa isang handa at ligtas na komunidad.”

Suporta ng Pamahalaang Bayan

Ang naturang pagsasanay ay buong sinuportahan ni Hon. Reynante “Jowar” S. Bautista, Punong Bayan ng Angat at MDRRM Council Chairperson, bilang bahagi ng patuloy na adbokasiya ng bayan para sa kaligtasan, kahandaan, at katatagan ng mga Angateño.

Patuloy na isinusulong ng Angat MDRRMO ang mga programang nakatuon sa kapasidad-building at partnership development upang masiguro na bawat sektor—gobyerno man o pribado—ay may kakayahang tumugon sa oras ng pangangailangan.