Ligtas na Bakasyon at Semana Santa: Angat PNP, Naglabas ng Gabay para sa Seguridad ng mga Mamamayan

Upang masiguro ang isang mapayapa at iwas-aberyang paggunita ng Semana Santa at pagdiriwang ng Summer Vacation, pormal na naglabas ng mga Safety Tips ang Angat Municipal Police Station (MPS) para sa kaalaman ng lahat ng Angatenyo at mga bisitang dadayo sa bayan.

Sa ilalim ng direktiba ni PMAJ Joel M. Alba, Acting Chief of Police, mas pinaiigting ng kapulisan ang kanilang presensya sa mga simbahan, terminal, at mga pasyalan gaya ng kailugan. Gayunpaman, binigyang-diin ng PNP na ang seguridad ay nagsisimula sa bawat indibidwal at tahanan.

Narito ang ilang mahahalagang paalala mula sa ating kapulisan:

• Iwas-Nakawan sa Tahanan: Bago umalis para sa bakasyon, tiyaking naka-lock ang lahat ng pinto at bintana. Huwag mag-iwan ng mga mamahaling gamit sa labas ng bahay at iwasang mag-post ng "real-time" updates sa social media na wala ang tao sa bahay.

• Ligtas na Pagbiyahe: Suriin ang kondisyon ng sasakyan (BLOWBAGETS) bago bumiyahe. Tiyaking nasa maayos na kundisyon ang driver at sumunod sa mga batas trapiko.

• Kaligtasan sa Kailugan at Resorts: Para sa mga maliligo sa Angat River o mga lokal na resorts, huwag pababayaan ang mga bata nang walang bantay. Iwasan ang paglangoy kung nakainom ng alak upang maiwasan ang sakuna.

• Maging Alerto sa Mataong Lugar: Sa mga dadalo sa prusisyon at Visita Iglesia, ingatan ang mga personal na gamit gaya ng pitaka at cellphone laban sa mga mandurukot.

  
  

Ang mga hakbang na ito ay bahagi ng kampanya ng Lokal na Pamahalaan katuwang ang PNP upang matiyak na ang bakasyon sa Angat ay mananatiling Handa, Ligtas, at Panatag.