LGU, Ipinagmalaki ang Outstanding Award ng Dalawang Lokal na Mataas na Paaralan

Patuloy na umaani ng tagumpay at pagkilala sa buong rehiyon ang sektor ng edukasyon sa bayan matapos makamit ng dalawa pang pampublikong paaralan ang Outstanding Accomplishment sa katatapos lamang na Regional Awarding of Functional School Governance Council (SGC) and Capacity Building on Expanded School Governance sa ilalim ng Kagawaran ng Edukasyon (DepEd) Rehiyon III.

Bunga nito, isang taos-pusong pagbati at pagpupugay ang ipinaabot ng Pamahalaang Bayan ng Angat sa Pres. Diosdado P. Macapagal Memorial High School at Angat National High School sa pagdadala ng panibagong karangalan sa buong bayan.

Ang prestihiyosong rehiyonal na parangal ay iginawad bilang pagkilala sa huwarang pamamahala at matagumpay na pagpapatupad ng mga programa ng kani-kanilang mga school heads:

• Dr. Virginia San Gabriel – Punong-guro ng Pres. Diosdado P. Macapagal Memorial High School

• Sir Bernardino Facun – Punong-guro ng Angat National High School

Naging matibay na sandigan sa nakamit na tagumpay ang walang-sawang dedikasyon ng mga guro, mga miyembro ng School Governance Council, mga magulang, at mga katuwang sa komunidad na patuloy na nagsisikap para sa kapakanan ng mga mag-aaral.

Ang pagkakamit ng Outstanding Accomplishment ay patunay na matagumpay na pinalakas ng dalawang paaralan ang ugnayan sa pagitan ng akademe, ng tahanan, at ng pamahalaan. Ipinapakita nito na ang aktibong pakikilahok ng iba't ibang sektor ay isang mahalagang pundasyon upang makapagtatag ng isang bukas at epektibong sistema ng edukasyon para sa kabataang Angateño.

Sa pamamagitan ng maayos na pamamahala ng pondo at mga programa sa loob ng paaralan, masisiguro ang mas magandang kinabukasan at kalidad ng pagkatuto ng mga mag-aaral.

Ayon sa pahayag ng lokal na pamahalaan, ang tagumpay na ito ay hindi lamang para sa mga nabanggit na institusyon kundi isang malaking karangalan na ibinabahagi sa buong Bayan ng Angat. Ito ay patotoo na kapag nagkakaisa ang paaralan at ang pamayanan sa iisang layunin, mas maraming pangarap ang natutupad at mas maraming kabataan ang nabibigyan ng pagkakataong umunlad.