Laban sa Hoarding at Sabotahe sa Ekonomiya: PNP Angat, Nagsagawa ng Inspeksyon sa mga Gasolinahan

Bilang bahagi ng mas pinalakas na kampanya ng pamahalaan laban sa mga ilegal na aktibidad sa kalakalan, nagsagawa ng malawakang inspeksyon ang Angat Municipal Police Station (MPS) sa mga gasolinahan sa buong bayan ngayong ika-12 ng Marso, 2026.

Ang operasyon ay pinamunuan ni PCPT Lydio Venigas (Duty Officer of the Day), sa ilalim ng direktiba ni PMAJ Joel M. Alba, Acting Chief of Police. Layunin ng hakbang na ito na matiyak na walang nagaganap na hoarding o ilegal na pagtatago ng suplay ng petrolyo sa gitna ng mga ulat ng kakulangan at hindi makatwirang pagtaas ng presyo sa merkado.

Ang aktibidad na ito ay nakaangkla rin sa mga probisyon ng Republic Act No. 12022 o ang “Anti-Agricultural Economic Sabotage Act.” Bagama’t nakatuon sa sektor ng agrikultura, ang batas na ito ay nagbibigay-diin sa mas mabigat na parusa para sa mga mapapatunayang nagsasagawa ng manipulasyon sa suplay ng mga pangunahing bilihin at produkto na direktang nakakaapekto sa ekonomiya at kabuhayan ng mga mamamayan, kabilang ang mga magsasaka at mangingisda sa Angat.

Ayon sa PNP Angat, ang regular na visitation at inspection ay isasagawa upang protektahan ang mga konsumer mula sa mga mapagsamantalang negosyante. Tiniyak ng kapulisan na mananatiling bukas ang kanilang linya para sa anumang sumbong mula sa publiko hinggil sa mga establisyimentong lumalabag sa batas.