Kalusugan ng Angatenyo, Higit na Pinatibay sa Monthly Meeting ng Local Health Board

Bilang bahagi ng mas pinalakas na adbokasiya para sa kalusugan ng bawat mamamayan, matagumpay na idinaos ang Monthly Meeting ng Local Health Board (LHB) sa ilalim ng pamumuno ni Municipal Health Officer Dra. Guillerma Bartolome.

Naging sentro ng pagpupulong ang masusing pagsusuri sa implementasyon ng mga programa ng Department of Health (DOH) mula sa nagdaang taon. Tinalakay rin ang mga naunang resolusyon ng LHB at ang paghahanda ng mga kaukulang dokumento para sa prestihiyosong Gawad Galing Kalusugan, na naglalayong kilalanin ang kahusayan ng bayan sa serbisyo-medikal.

Kabilang sa mga prayoridad na inisyatibong tinalakay ay ang pagpapatupad ng Purok Kalusugan, Road Safety, at ang pagbuo ng Healthy Workplace Committee. Ang nasabing pagtitipon ay dinaluhan nina Punong Bayan Igg. Reynante S. Bautista at Konsehal Blem Cruz, kasama ang iba pang miyembro ng lupon. Ang presensya ng mga lokal na lider ay nagpapakita ng matibay na suporta sa layuning makabuo ng isang mas inklusibo, ligtas, at malusog na komunidad para sa lahat ng Angatenyo.