Anak ng Angat at JOWABLE Youth Member, pumasa sa Licensure Examination for Social Workers

Isang karangalan para sa bayan ng Angat ang tagumpay ni Sophia Mae Varilla, isa sa mga aktibong miyembro ng JOWABLE Youth, matapos niyang matagumpay na makapasa sa Licensure Examination for Social Workers.

Sa isang mensaheng puno ng papuri at inspirasyon, ipinaabot ni Punong Bayan Reynante S. Bautista ang kanyang taos-pusong pagbati kay Varilla, na kanyang inilarawan bilang “isa sa mga huwarang kabataan ng Angat.”

Ayon kay Mayor Bautista, ang tagumpay ni Sophia ay bunga ng kanyang pagsisikap, sakripisyo, at matibay na pananampalataya sa Diyos at sa sarili. Ipinahayag din ng punong bayan na ang pagkakapasa niya ay isang patunay na walang imposible sa kabataang may disiplina, karanasan, at malasakit sa kapwa.

Dagdag pa ni Mayor Bautista, sa panahong higit na kailangan ng bansa ang mga lingkod-bayan na may empatiya at malasakit, ang pagkamit ni Sophia ng lisensya bilang Social Worker ay isang hakbang tungo sa mas makabuluhang paglilingkod sa komunidad, lalo na sa mga sektor na nangangailangan ng kalinga at atensyon.

Ang kanyang tagumpay ay nagsisilbing inspirasyon sa mga kapwa kabataan, lalo na sa mga miyembro ng JOWABLE Youth, upang ipagpatuloy ang kanilang mga pangarap na may kasamang determinasyon at kababaang-loob.

Sa pagtatapos ng kanyang mensahe, ipinahayag ni Mayor Bautista ang pasasalamat sa Diyos sa biyayang natanggap ni Sophia at ang pakikiisa sa kagalakan ng kanyang pamilya, mga kaibigan, at buong pamayanan.

“Mabuhay ka, Sophia Mae Varilla! Kami ay labis na proud sa’yo. Patuloy mong tanglawan ang landas ng serbisyo, at dalhin ang dangal ng kabataang Angateño saan ka man dalhin ng iyong propesyon,” pagtatapos ni Mayor Bautista.