IEC/CEPA Activity sa Matias A. Fernando Memorial School: Pagtuturo ng Kabataan Tungkol sa Batas Pangkalikasan

Noong Agosto 12, 2025, matagumpay na isinagawa ang isang makabuluhang Information, Education, and Communication/Communication, Education, and Public Awareness (IEC/CEPA) activity sa Matias A. Fernando Memorial School katuwang ang mga kinatawan mula sa DENR Bulacan.

Layunin ng aktibidad na palakasin ang kaalaman at kamalayan ng mga kabataang lider, partikular ng YES-O at SG officers, hinggil sa mahahalagang batas pangkalikasan tulad ng Clean Air Act (R.A. 8749), Clean Water Act, at R.A. 9003 o Ecological Solid Waste Management Act.

Tinalakay sa diskusyon ang mga isyung may direktang epekto sa komunidad tulad ng pangangalaga sa anyong tubig, anyong lupa, at hangin. Ipinakilala rin ang kahalagahan ng pagtatayo ng Materials Recovery Facility (MRF) sa bawat barangay upang magkaroon ng mas malinaw na ideya ang mga mag-aaral sa tamang pamamahala ng basura.

Bilang bahagi ng pagbibigay-kaalaman, binigyang-diin din ang aral mula sa trahedyang naganap sa Payatas Landfill. Ang mga kabataang lider na nakibahagi ay nagkaroon ng pagkakataong pagnilayan ang kahalagahan ng wastong pangangalaga sa kapaligiran at ang epekto ng kapabayaan dito.

Higit sa lahat, ipinaalala sa mga mag-aaral ang kanilang papel bilang kabataang lider sa pagsusulong ng kalinisan, kaayusan, at kaligtasan ng kapaligiran. Sa pamamagitan ng mga simpleng hakbang, maaari silang maging mabisang tinig ng pagbabago sa kanilang paaralan at komunidad.

Lubos ang pasasalamat ng MENRO Angat sa Punong Guro ng Matias A. Fernando Memorial School, Ma’am Marielyn D. Castillo, gayundin sa buong kaguruan at lahat ng nakibahagi sa programa. Ang kanilang kooperasyon ay nagsilbing mahalagang ambag sa patuloy na pagsusulong ng mas malinis, ligtas, at maayos na kapaligiran para sa lahat.