Higit 4,500 Angatenyo, Nakinabang sa 2nd Cycle ng Rice Subsidy Program 2026

Patuloy ang pag-abot ng suporta sa iba't ibang sektor ng komunidad matapos ipamahagi ng Pamahalaang Bayan ng Angat ang tig-10 kilong bigas sa humigit-kumulang 4,500 kwalipikadong benepisyaryo sa ilalim ng Rice Subsidy Program 2026 (2nd Cycle).

Ang naturang pamamahagi ay bahagi ng pambansang programa ng pamahalaan na isinasakatuparan katuwang ang Lokal na Pamahalaan ng Angat upang magkaloob ng karagdagang tulong sa pang-araw-araw na pangangailangan ng mga pamilyang Angatenyo.

Batay sa opisyal na listahan at mga pamantayang itinakda sa implementasyon ng programa, kabilang sa mga tumanggap ng subsidiya sa ikalawang yugto ang mga sumusunod:

• Magsasaka at Mangingisda: Mga pangunahing sektor sa sektor ng agrikultura at pangingisda.

• Solo Parents: Mga solong magulang na nagtataguyod sa kanilang pamilya.

• Transport Groups: Mga kasapi ng Tricycle Operators and Drivers Association (TODA) at Jeepney Operators and Drivers Association (JODA).

• Vendors at Minimum Wage Earners: Mga maliliit na tindero sa pamilihan at mga manggagawang tumatanggap ng minimum na pasahod.

Naging mabilis at maayos ang distribusyon ng ayuda sa pamamagitan ng koordinasyon ng lokal na pamahalaan, mga opisyal ng iba't ibang barangay, at mga katuwang na ahensya.

Ayon sa Pamahalaang Bayan ng Angat, ang matagumpay na pamamahagi ay patunay ng epektibong ugnayan ng pambansa at lokal na pamahalaan upang masiguro na ang tulong ay direktang nakararating sa mga mamamayang higit na nangangailangan.