Diwa ng Araw ng mga Bayani, Binigyang-Pugay ng Pamahalaang Bayan ng Angat

Nakiisa ang Pamahalaang Bayan ng Angat sa buong bansa sa paggunita sa Araw ng mga Bayani sa pamamagitan ng pag-aalay ng taos-pusong pagpupugay sa mga Pilipinong nag-alay ng tapang, sakripisyo, at serbisyo para sa inang bayan.

Sa mensahe ng pamahalaang lokal, binigyang-diin na ang kabayanihan ay hindi lamang nagtatapos sa mga pahina ng kasaysayan, kundi patuloy na makikita sa pang-araw-araw na buhay sa bawat komunidad. Kabilang dito ang mga magulang na nagsusumikap para sa pamilya, mga guro at manggagawang tapat sa tungkulin, mga boluntaryong laging handang tumulong, at mga mamamayang nakikiisa para sa ikabubuti ng nakararami.

Ayon sa Pamahalaang Bayan, ang pagpili na tumulong, makiisa, maging responsable, at maglingkod nang tapat araw-araw ay pagpapatuloy sa diwa ng kabayanihan ng mga nauna sa atin. Ipinaalala rin na ang kabayanihan ay hindi lamang alaala ng nakaraan kundi isang pananagutang dapat isabuhay ngayon ng bawat Pilipino.