Dalawang Mataas na Paaralan sa Angat, Pinarangalan sa Regional School Governance Council Awards

Muling nagningning ang sektor ng edukasyon sa bayan matapos magwagi ng prestihiyosong pagkilala ang dalawang pampublikong paaralan sa katatapos lamang na Regional Awarding of Functional School Governance Council (SGC) and Capacity Building on Expanded School Governance sa ilalim ng Kagawaran ng Edukasyon (DepEd) Rehiyon III.

Bunga nito, isang taos-pusong pagbati at pagpupugay ang ipinaabot ng Lokal na Pamahalaang Bayan ng Angat sa Binagbag National High School at Angel M. Del Rosario High School dahil sa kanilang natatanging katayuan sa mahusay na pamamahala ng paaralan.

Ang rehiyonal na parangal na ito ay iginawad bilang pagkilala sa epektibong pagpapatupad ng School Governance Council ng dalawang institusyon. Ito ay sumasalamin sa tapat at inklusibong pamumuno ng kani-kanilang mga school heads:

• Sir Richard C. Bagtas – Punong-guro ng Binagbag National High School

• Sir Mark Lee C. Sarmiento – Punong-guro ng Angel M. Del Rosario High School

Ang tagumpay na ito ay naging posible rin dahil sa walang-sawang dedikasyon ng mga guro, mga magulang, at mga katuwang sa komunidad na nagtulungan upang masiguro na ang bawat mag-aaral na Angateño ay nakatatanggap ng de-kalidad na edukasyon.

Ang pagkakaroon ng isang functional o aktibong SGC ay patunay na ang dalawang paaralan ay bukas sa pakikipagtulungan at partisipasyon ng iba't ibang sektor.

Ayon sa pahayag ng pamahalaang bayan, ang tagumpay na ito ay hindi lamang para sa mga nabanggit na paaralan kundi isang malaking karangalan para sa buong Bayan ng Angat. Ito ay nagsisilbing paalala na kapag ang komunidad ay nagkakaisa at may iisang layunin, mas nagiging makabuluhan at malawak ang epekto ng paglilingkod sa kabataan.