‘Buntis Party’, Isinagawa sa Sulucan BHS para sa Ligtas na Pagbubuntis at Panganganak

Upang mas mapalakas ang kaalaman at kahandaan ng mga nagdadalang-tao sa bayan, matagumpay na idinaos ng Angat Rural Health Unit (RHU) ang isang "Buntis Party" nitong Hulyo 9, 2026, sa Sulucan Barangay Health Station (BHS).

Bitbit ang temang “Buntis ugnayan, isang kaligayahan at kahandaan, ating pag-planuhan,” nagtipon-tipon ang mga expectant mothers upang makatanggap ng mahahalagang kaalaman ukol sa tamang pangangalaga sa sarili at sa sanggol sa sinapupunan.

Layunin ng aktibidad na ito na tiyakin ang ligtas na pagbubuntis at panganganak ng mga ina sa pamamagitan ng tamang edukasyong pangkalusugan. Tinalakay sa naturang programa ang mga sumusunod:

• Pangangalaga bago Manganak (Prenatal Check-up): Kahalagahan ng regular na pagpapasuri sa health center.

• Wastong Nutrisyon: Pagkain ng masusustansyang pagkain para sa kalusugan ng ina at ng sanggol.

• Birth Plan at Kahandaan: Pagpaplano sa araw ng panganganak upang maiwasan ang anumang komplikasyon.

• Pangangalaga sa Sanggol: Mga batayang kaalaman sa pagpapasuso (breastfeeding) at immunization.

Ayon sa Angat RHU, ang mga ganitong inisyatibo sa mga BHS ay bahagi ng patuloy na adbokasiya ng Municipal Health Office na ipaabot ang de-kalidad at libreng serbisyong pangkagalingan sa bawat barangay, lalo na para sa mga ina at nakababatang mamamayan ng Angat.