BPLO Angat, Nanawagan sa mga Negosyante na Magparehistro para sa Mas Maayos na Serbisyo

Upang masiguro ang kaayusan at legalidad ng mga negosyo sa bayan, muling nanawagan ang Business Permits and Licensing Office (BPLO) - Angat sa lahat ng mga negosyante na asikasuhin ang kanilang mga kaukulang permiso sa lalong madaling panahon.

Sa ilalim ng temang “Be Proud... dahil LEGAL!”, binibigyang-diin ng BPLO ang kahalagahan ng pagkakaroon ng lehitimong lisensya upang mas maprotektahan ang mga ari-arian at makatanggap ng maayos at episyenteng serbisyo mula sa lokal na pamahalaan. Ang pagpaparehistro ay hindi lamang pagsunod sa batas, kundi isang paraan din upang tumaas ang tiwala ng mga mamimili sa kanilang mga produkto at serbisyo.

Inaanyayahan ang lahat ng mga business owners na magtungo at makipag-ugnayan sa tanggapan ng BPLO na matatagpuan sa New Municipal Building, Brgy. San Roque, Angat, Bulacan. Tinitiyak ng pamunuan na nakahanda ang kanilang mga kawani na magbigay ng mabilis at madaling proseso para sa mga aplikante.

Ang kampanyang ito ay bahagi ng adhikain ng Pamahalaang Bayan na gawing mas business-friendly ang Angat at mapalakas ang lokal na ekonomiya sa pamamagitan ng pagsuporta sa mga legal na negosyo.