Barangay Pulong Yantok, Magsasagawa ng 1st Semester Assembly 2026

Sa layuning mapanatili ang tapat na ugnayan sa pagitan ng pamunuan at ng mga mamamayan, itinakda ng Sangguniang Barangay ng Pulong Yantok ang kanilang Barangay Assembly para sa unang semestre ng taong 2026 ngayong darating na Sabado, ika-28 ng Marso.

Ang pagtitipon ay gaganapin sa Pulong Yantok Covered Court simula alas-1:00 ng hapon. Inaasahang tatalakayin sa nasabing asamblea ang mahahalagang ulat ng barangay, kabilang ang mga nagawa at kasalukuyang proyekto, gayundin ang mga planong programa para sa ikauunlad ng komunidad.

Ayon sa pamunuan sa pangunguna ni Punong Barangay Renato Abong San Pedro, ang aktibidad na ito ay isang mahalagang pagkakataon para sa mga residente na direktang makilahok at magbigay ng kanilang mga mungkahi para sa ikabubuti ng barangay. Binibigyang-diin sa temang "Makilahok, Makialam, Makiisa" ang tungkulin ng bawat mamamayan na maging bahagi ng progresibong pamamahala.

Hinihikayat ang lahat ng mga taga-Pulong Yantok na dumalo at makiisa sa talakayang ito upang masiguro ang patuloy na kaayusan, kaligtasan, at kaunlaran ng ating barangay.