Barangay Health Workers ng Pulong Yantok, Pinarangalan sa Kanilang ‘Major Accomplishment’

Binigyang-pugay ng lokal na pamahalaan ng Barangay Pulong Yantok ang natatanging dedikasyon at serbisyo ng kanilang mga Barangay Health Workers (BHW) matapos ang matagumpay na pagganap ng mga ito sa kanilang Major Accomplishment ngayong buwan.

Sa ilalim ng pangunguna ni Midwife Marlene Clemente, kinilala ang mga BHW sa kanilang walang sawang paglilingkod at malasakit sa kalusugan ng bawat pamilyang taga-Pulong Yantok. Ang nasabing pagkilala ay bunga ng kanilang maayos na pagpapatupad ng mga programang pangkalusugan, kabilang ang pagmomonitor sa mga residente, pagbabakuna, at pagbibigay ng pangunahing tulong medikal sa komunidad.

Ayon sa Sangguniang Barangay, ang kontribusyon ng mga BHW ay isa sa mga haligi ng maunlad at ligtas na barangay. Ang kanilang sakripisyo, lalo na sa pag-abot sa mga malalayong purok, ay tunay na kahanga-hanga at nararapat lamang na ipagmalaki ng buong sambayanan.

Nagpaabot ng pasasalamat ang pamunuan sa lahat ng mga BHW para sa kanilang tapat na pagseserbisyo. Inaasahang ang pagkilalang ito ay magsisilbing inspirasyon upang lalo pang mapabuti ang antas ng serbisyong pangkalusugan sa ating mahal na Barangay Pulong Yantok.