Bagong MLGOO ng Angat, Pormal na Ipinakilala sa Lingguhang Flag Raising Ceremony ng Pamahalaang Bayan

Pinasimulan ng mga kawani at opisyal ng Pamahalaang Bayan ng Angat ang kanilang linggong paggawa sa pamamagitan ng tradisyunal na lingguhang pagtataas ng watawat, na pinangunahan ng tanggapan ng Municipal Assessor’s Office.

Naging masigla at produktibo ang pagsalubong sa bagong linggo sa pagdalo ng mga matataas na opisyal ng bayan, kabilang sina Punong Bayan Hon. Reynante "Jowar" S. Bautista, Konsehal Blem Cruz, at Konsehal JP Solis. Nakiisa rin sa seremonya ang mga puwersa ng Angat PNP, Angat BFP, mga pinuno ng iba’t ibang departamento, at ang kabuuang puwersa ng mga kawani ng munisipyo.

Ang highlight ng naturang seremonya ay ang opisyal na pagpapakilala at pagtanggap ng pamahalaang lokal sa bagong talagang Municipal Local Government Operations Officer (MLGOO) ng Angat na si Cecil R. Caburnay.

Bilang kinatawan ng Department of the Interior and Local Government (DILG) sa antas-munisipyo, si MLGOO Caburnay ang katuwang ng lokal na pamahalaan sa paggabay, pagsubaybay, at pagsusulong ng mga programa para sa tapat at epektibong pamamahala sa buong bayan.

Sa mensahe ng pagtanggap, binigyang-diin ng pamahalaang lokal ang kahalagahan ng pagkakaisa at maayos na koordinasyon sa pagitan ng iba't ibang ahensya upang mas mapabilis ang paghahatid ng tapat at dekalidad na serbisyo sa bawat Angateño.

Matapos ang seremonya, agad ding nagbalik sa kani-kanilang mga tanggapan ang mga kawani upang ipagpatuloy ang paglilingkod sa publiko nang may ngiti, sipag, at dedikasyon.