Bagong Mag-asawang Aranas, Binigyan ng Basbas ng LGU Angat

Isang panibagong pamilya ang opisyal na nabuo sa pagbubukas ng buwan ng Hunyo matapos matagumpay na pinagtibay ng Pamahalaang Bayan ng Angat ang pag-iisang dibdib ng magsing-irog na sina Mr. & Mrs. J Mar at Rodina Aranas.

Sa harap ng batas at ng lokal na pamahalaan, buong-pusong nangako ng katapatan, pagmamahal, at habang-buhay na pagsasama ang dalawa na sinaksihan ng kanilang mga malalapit na kamag-anak at kaibigan.

Kasabay ng pagpapatibay sa kanilang kasal, inihatid din sa bagong mag-asawa ang mahahalagang pangaral at paalala na magsisilbing pundasyon ng kanilang pagsasama. Binigyang-diin sa seremonya ang kahalagahan ng unawaan, pagbibigayan, at katatagan sa gitna ng mga hamon na dumarating sa buhay-may-asawa.

Isang mainit na pagbati at basbas naman ang ipinaabot ng buong Pamahalaang Bayan ng Angat para sa panibagong yugto ng buhay nina J Mar at Rodina bilang magkapareha sa komunidad.

Ang pagpapakasal na ito ay bahagi ng patuloy na pagsuporta ng LGU Angat sa pagpapatibay ng legal at sagradong pundasyon ng mga pamilyang Angateño, na siyang pangunahing yunit ng isang matatag at maunlad na lipunan.