Araw ng Kagitingan 2026: Bayan ng Angat, Nagpugay sa Tapang at Sakripisyo ng mga Bayaning Pilipino

Kasabay ng pag-akyat ng pambansang watawat, nakiisa ang Lokal na Pamahalaang Bayan ng Angat sa buong bansa sa paggunita ng ika-84 na anibersaryo ng Araw ng Kagitingan ngayong Huwebes, ika-9 ng Abril, 2026.

Ang okasyong ito ay isang mataas na pagpupugay sa hindi matatawarang tapang, sakripisyo, at pagmamahal sa bayan ng mga beteranong Pilipino na lumaban para sa kalayaan. Ayon sa pahayag ng Lokal na Pamahalaan, ang alaala ng kanilang kagitingan ay hindi lamang bahagi ng kasaysayan, kundi isang buhay na inspirasyon para sa kasalukuyang henerasyon ng mga lingkod-bayan at mamamayan.

Binigyang-diin sa mensahe ng Pamahalaang Bayan na ang diwa ng kagitingan sa modernong panahon ay makikita sa integridad at malasakit, ang tapat na paglilingkod sa kapwa at sa komunidad.

Layunin ng paggunitang ito na muling itanim sa puso ng bawat mamamayan ang pagmamahal sa Inang Bayan at ang pagtataguyod ng isang lipunang matatag, makatarungan, at may malasakit sa bawat isa.