Angat, Kaisa sa Opisyal na Pagbubukas ng Singkaban Festival 2025: Pagdiriwang ng Kasaysayan at Kultura ng Bulacan

Opisyal nang binuksan ang taunang pagdiriwang ng Singkaban Festival 2025—ang kinikilalang “Mother of All Fiestas” sa lalawigan ng Bulacan, kung saan itinatampok ang makulay na kasaysayan, mayamang kultura, at natatanging tradisyon ng ating lalawigan. Ang kapistahang ito ay nagsisilbing bukas na aklat ng ating nakaraan at isang inspirasyon tungo sa patuloy na pag-unlad ng bawat Bulakenyo.

Sa ngalan ng Pamahalaang Bayan ng Angat, ipinaaabot ng inyong lingkod ang taus-pusong pakikiisa sa makabuluhang pagdiriwang na ito. Nawa’y maging masaya, mapayapa, at makabuluhan ang kabuuan ng kapistahan—isang kapistahang hindi lamang pagdiriwang, kundi isang paggunita sa ating pinagmulan at pagpapahalaga sa ating pagkakakilanlan bilang Pilipino.

Ang Singkaban Festival ay inaasahang rururos sa paggunita ng Malolos Congress—ang kauna-unahang pambansang parlyamento na siyang naging batayan ng pagkakatatag ng Unang Republika ng Pilipinas sa makasaysayang Barasoain Church. Isang napakahalagang tagpo sa ating kasaysayan na patuloy na nagbibigay saysay sa ating kalayaan at soberanya.

Nawa’y magsilbi ang Singkaban Festival 2025 bilang pagkakataon upang mas lalo pang pagtibayin ang ating pagkakaisa, palakasin ang ating pananampalataya, at ipagmalaki ang ating mayamang pamana bilang mga Bulakenyo at bilang mga Pilipino.