7AM - 6PM, Bagong Office Hours sa Angat Munisipyo

Ipinababatid ng Pamahalaang Bayan ng Angat sa lahat ng mga mamamayan ang pagpapatupad ng Temporary Work Arrangement para sa mga tanggapan ng munisipyo. Sa ilalim ng bagong sistemang ito, ang onsite work schedule ay magiging apat na araw na lamang kada linggo.

Ang pagbabagong ito ay tugon sa Memorandum Circular mula sa Malacañang na naglalayong maging mas praktikal ang operasyon ng gobyerno sa gitna ng mga hamong pang-ekonomiya.

Upang matiyak na hindi mababawasan ang oras ng paglilingkod sa publiko, pinalawig ang oras ng operasyon mula Lunes hanggang Huwebes:

• Araw: Lunes hanggang Huwebes (Monday to Thursday)

• Oras: 7:00 AM – 6:00 PM

• Status: Walang onsite work kapag Biyernes (Friday)

Ayon sa pamunuan, ang hakbang na ito ay makatutulong nang malaki sa mga empleyado ng pamahalaan upang makatipid sa gastusin sa transportasyon at mabawasan ang konsumo sa enerhiya o kuryente sa mga gusali ng gobyerno.

Sa kabila ng pinaikling bilang ng araw ng pagpasok, binigyang-diin ni Mayor Reynante "Jowar" S. Bautista na mananatiling episyente at tuloy-tuloy ang pagkakaloob ng serbisyo publiko dahil sa mas mahabang operating hours sa loob ng apat na araw.

Inaanyayahan ang lahat ng mga kababayang Angateño na planuhin nang maaga ang kanilang pagpunta sa munisipyo para sa mga business permits, clearances, at iba pang transaksyon batay sa bagong iskedyul. Siguraduhin na magtungo sa pagitan ng 7:00 AM hanggang 6:00 PM mula Lunes hanggang Huwebes upang matiyak na kayo ay mapagsisilbihan.

Para sa mga emergency services gaya ng kalusugan (RHU) at sakuna (MDRRMO), asahan ang tuloy-tuloy na pagtugon ayon sa kanilang itinakdang emergency protocols.