47th Daycare Moving Up sa Angat: 820 Mag-aaral, Handa na sa Panibagong Yugto

Punong-puno ng saya at pag-asa ang Angat Municipal Gymnasium matapos idaos ang 47th Daycare Moving Up Ceremony na ginanap noong ika-23 hanggang ika-25 ng Marso, 2026.

Sa ilalim ng temang “Munting Hakbang Tungo sa Maunlad na Kinabukasan,” kabuuang 820 daycare learners mula sa 23 Child Development Centers sa buong bayan ang opisyal nang tumuntong sa susunod na yugto ng kanilang edukasyon. Ang nasabing programa ay pinangasiwaan ng Municipal Social Welfare and Development Office (MSWDO) sa pangunguna ni Ma'am Menchie Bollas.

Personal na nakiisa sa selebrasyon si Punong Bayan Igg. Reynante S. Bautista, kasama ang mga miyembro ng Sangguniang Bayan at mga Punong Barangay. Sa kanyang mensahe, binigyang-diin ng Punong Bayan ang kahalagahan ng maagang edukasyon bilang pundasyon ng karakter at talino ng mga bata na magiging lider ng bayan sa hinaharap.

Ang tagumpay ng mga munting mag-aaral ay hindi lamang bunga ng kanilang pagsisikap kundi pati na rin ng dedikasyon ng mga magulang at Child Development Workers na nagsilbing gabay sa kanilang unang hakbang sa pag-aaral. Sa pamamagitan ng ganitong mga programa, muling pinatunayan ng Pamahalaang Bayan ng Angat ang kanilang matatag na komitment sa paghubog ng isang matalino at disenteng kinabukasan para sa bawat batang Angateño.