Turnover Ceremony at Payout ng RRP-CCAM Project Lawa at Binhi, Matagumpay na Idinaos sa Bayan ng Angat

Isang makabuluhang hakbang tungo sa pagpapatatag ng kabuhayan at pangangalaga sa kalikasan ang isinagawa sa bayan ng Angat sa pamamagitan ng Turnover Ceremony at Payout ng Risk Resiliency Program–Climate Change Adaptation and Mitigation (RRP-CCAM) Project Lawa at Binhi. Ang naturang proyekto, na may kahulugan ding Local Adaptation of Water Access and Breaking Insufficiency through Nutritious Harvest for the Impoverished, ay nakatuon sa pagbibigay ng alternatibong pagkakakitaan habang pinalalakas ang kamalayan ng mamamayan hinggil sa kahalagahan ng seguridad sa pagkain at pakikipaglaban sa epekto ng pagbabago ng klima.

Umabot sa 500 benepisyaryo mula sa iba’t ibang sektor ang nakatanggap ng kanilang payout bilang bahagi ng nasabing programa. Sa loob ng 20 araw, aktibong lumahok ang mga kalahok sa pagtatanim ng gulay sa kani-kanilang mga lugar. Bukod sa dagdag-kita, layunin nitong ipakita na ang simpleng pagtatanim ay maaaring maging mahalagang hakbang sa pagpapalawak ng access sa masustansyang pagkain, pati na rin sa pagbawas ng mga panganib na dulot ng climate change.

Kasabay ng isinagawang payout ay ang turnover ceremony, kung saan pormal na ipinasa sa mga samahan ng mga lokal na magsasaka ang pamamahala at pagpapatuloy ng mga inisyatibo ng proyekto. Sa pamamagitan ng prosesong ito, nagiging katuwang ng pamahalaan ang mga magsasaka mismo sa pagpapatibay ng kanilang hanapbuhay, pagpapanatili ng masaganang ani, at pagtitiyak na magpapatuloy ang programang nakabatay sa pangangailangan ng kanilang komunidad.

Dumalo at nagbigay ng kanilang buong suporta sa aktibidad sina Punong Bayan Reynante S. Bautista, Konsehal JP Solis, at Regional Focal Person ng Project Lawa at Binhi, Rommel Casapao. Kasama rin sa programa ang mga kinatawan mula sa Municipal Social Welfare and Development Office (MSWDO) at Municipal Agriculture Office (MAO) na nagsilbing katuwang sa matagumpay na implementasyon ng proyekto.

Patuloy na magsisilbing haligi ng lokal na pamahalaan ang Project Lawa at Binhi sa pagpapatatag ng resilience ng bayan sa harap ng nagbabagong klima. Higit pa rito, nakatuon ang proyekto sa pagbibigay ng sapat na suporta sa ating mga magsasaka—na siyang haligi ng seguridad sa pagkain—upang masiguro ang isang mas matatag, masagana, at sustenableng kinabukasan para sa lahat ng Angatenyo.