Tatlong Oras na Pag-ulan sa Angat, Umabot sa 139.95mm — Higit Pa sa Hourly Rainfall ng Bagyong Ondoy at Ulysses

Angat, Bulacan — Umabot sa 139.95 millimeters (mm) ang dami ng ulan na bumuhos sa loob lamang ng tatlong oras, mula 2:00 AM hanggang 5:00 AM, ngayong araw, batay sa datos ng Operations Center ng Angat Municipal Disaster Risk Reduction and Management Office (MDRRMO).

Ayon sa ulat, katumbas ito ng 46.65mm ng ulan kada oras, na itinuturing na napakataas na rainfall intensity, dahilan upang umapaw ang mga creek at sapa at magdulot ng pagbaha sa ilang mabababang barangay sa bayan.

Mas Malakas Kaysa sa Rainfall Rate ng Ondoy at Ulysses

Batay sa historical rainfall data comparison ng MDRRMO, ang naitalang 46.65mm/hour na ulan sa Angat ay mas mataas pa kumpara sa hourly rainfall na naitala sa mga malalakas na bagyong Ondoy (2009) at Ulysses (2020).

• Bagyong Ondoy (2009): 454.9mm sa loob ng 24 oras o katumbas ng 18.95mm/hour (Science Garden, Quezon City)

• Bagyong Ulysses (2020): 356mm sa loob ng 24 oras o katumbas ng 14.83mm/hour (AWS Tanay, Rizal)

• 
  

Ipinapakita ng datos na sa loob lamang ng tatlong oras, ang lokal na thunderstorm na tumama sa bayan ay nagbuhos ng ulan na halos tatlong ulit na mas mataas kaysa sa hourly rainfall ng mga nabanggit na bagyo.

Epekto ng Biglaang Pag-ulan

Dahil sa biglaan at matinding pagbuhos ng ulan, ilang creek at sapa sa bayan ang agad na umapaw, na naging sanhi ng pagbaha sa mga barangay na nasa mababang lugar.

Ayon sa MDRRMO, bagama’t walang itinatayang bagyo o sama ng panahon, ang tuloy-tuloy na mataas na volume ng pag-ulan sa maikling oras ay maaari pa ring magdulot ng malawakang pagbaha at pinsala, lalo na kung mauulit sa mga susunod na araw.

“Ang ganitong klaseng localized thunderstorm ay patunay na dapat laging handa ang ating komunidad, kahit walang nakataas na storm signal,” ayon sa MDRRMO.

Paalaala sa Publiko

Pinapaalalahanan ng MDRRMO Angat ang lahat ng residente na maging mapagmatyag, iwasan ang pagtawid sa rumaragasang tubig, at agad na makipag-ugnayan sa mga awtoridad sakaling magkaroon ng pagbaha o emergency.

📞 Angat Rescue Hotline: 0923-926-3393 / 0917-710-5087

“Kahandaan sa bawat patak ng ulan — Ligtas na Angateño, Matatag na Bayan.”