Satellite Voter Registration sa Brgy. Sulucan, Hanggang 3:00 PM na Lamang Ngayong Araw!

Sa kabila ng maulang umaga, dagsa ang mga residente sa Barangay Hall ng Sulucan para sa isinasagawang Satellite Voter Registration ng COMELEC ngayong Sabado, ika-14 ng Pebrero, 2026.

Ang hakbang na ito ay bahagi ng inisyatibo ng Pamunuan ng Barangay upang ilapit ang serbisyo ng pamahalaan sa mga mamamayan at masiguro na ang bawat kwalipikadong botante ay makakapaghain ng kanilang aplikasyon nang mabilis at komportable.

Bukas ang registrasyon para sa mga sumusunod:

• First-time Voters: Mga kabataang nais lumahok sa susunod na halalan.

• Transferees: Mga bagong lipat na residente sa Barangay Sulucan na nais ilipat ang kanilang record.

• Reactivation: Para sa mga dati nang botante ngunit hindi nakaboto sa nakaraang dalawang magkasunod na eleksyon.

  
  

Ayon sa mga opisyal ng barangay, napakabilis lamang ng proseso basta’t kumpleto ang dalang requirements. Pinapaalalahanan ang lahat na magdala ng isang (1) Valid ID (gaya ng National ID, Student ID, o Driver’s License).

Binigyang-diin ng Sangguniang Barangay na ang operasyon ay tatagal lamang hanggang 3:00 PM ngayong araw. Dahil dito, hinihimok ang mga hindi pa nakakapunta na samantalahin ang nalalabing oras upang hindi na kailanganin pang pumunta sa bayan para sa regular na registration sa opisina ng COMELEC.