Ordinansa sa Responsableng Pag-aalaga ng Aso, Mahigpit Nang Ipinatutupad sa Barangay Niugan

Opisyal nang ipinatupad ng Sangguniang Barangay ng Niugan ang Kapasiyahan Blg. 13 (Serye ng 2024) at Ordinansa Blg. 5-B na naglalayong isulong ang kampanyang "Aso Mo, Pananagutan Mo."

Ang hakbang na ito ay binuo upang matiyak ang kaligtasan ng mga mamamayan at maitaguyod ang responsableng paggawad ng kalinga sa mga alagang hayop. Sa ilalim ng nasabing ordinansa, mahigpit na ipinagbabawal ang pagpapagala ng aso sa mga kalsada.

Inaatasan ang mga may-ari na itali o ikulong ang kanilang mga alaga, bigyan ang mga ito ng sapat na pagkain, at tiyaking may kaukulang bakuna.

Ipinabatid din ng pamunuan ng barangay na may kaukulang multa ang sinumang lalabag:

• ₱500 – Para sa mga may-ari na tumatangging magtali ng kanilang asong gala.

• ₱1,000 – Para sa mga may-ari na ayaw managot sa kagat o tumangging magbayad sa gastusin sa pagpapagamot ng biktima.

  
  

Paalala ng Sangguniang Barangay, ang anumang insidente o pinsalang maidudulot ng hayop ay direktang pananagutan ng nagmamay-ari nito. Para sa mga residenteng nais mabasa ang buong dokumento ng ordinansa, maaari nilang i-scan ang opisyal na QR code o bisitahin ang ibinahaging Google Drive link sa opisyal na pahina ng barangay.