MELLPI Pro 2026, Isinagawa upang Masuri ang mga Programang Pangnutrisyon sa Bayan

Upang matiyak ang paghahatid ng mas mahusay at epektibong serbisyong pangkalusugan, isinagawa sa Municipal Conference Hall ang Monitoring and Evaluation of Local Level Plan Implementation Protocol (MELLPI Pro) 2026.

Ang taunang ebalwasyong ito ay naglalayong masuri ang pagiging epektibo ng mga ipinatutupad na programa sa nutrisyon sa lokal na antas, matukoy ang mga aspeto na maaari pang mapahusay, at masigurong ang mga serbisyong pampubliko ay tunay na nakatutugon sa pangangailangan ng komunidad.

Pinangunahan ng Municipal Nutrition Office ang aktibidad, katuwang ang mga Lingkod Lingap sa Nayon (LLN) at mga miyembro ng Municipal Nutrition Committee (MNC). Nakiisa rin sa mahalagang talakayan sina Punong Bayan Igg. Reynante S. Bautista at OIC Municipal Administrator Carlos Rivera Jr.

Nagsilbing tagasuri ang Provincial Nutrition Evaluation Team na nagsagawa ng masusing pagbusisi sa implementasyon ng mga programa ng bayan. Nagbahagi rin ang grupo ng mga mahahalagang rekomendasyon na siyang magiging gabay ng lokal na pamahalaan upang lalo pang mapaigting ang mga inisyatiba sa larangan ng nutrisyon.

Ang MELLPI Pro 2026 ay naging isang malaking pagkakataon upang kilalanin ang mga kasalukuyang tagumpay ng Angat habang patuloy na pinapahusay ang mga estratehiya at serbisyong pangnutrisyon para sa mga mamamayan.

Ayon sa pamunuan, sa pamamagitan ng matatag na pagtutulungan ng lokal na pamahalaan at ng iba't ibang sektor, mas napagtitibay ang pangarap na makamit ang isang mas malusog, mas matatag, at mas maunlad na Bayan ng Angat.