Lingguhang Pagtataas ng Watawat

Pinangunahan ng masisipag na kawani ng Market Office ang lingguhang flag raising ceremony na ginanap sa harap ng Angat Municipal Hall. Katuwang nila sa seremonya sina Punong Bayan Reynante S. Bautista, Pangalawang Punong Bayan Arvin Agustin, mga kagalang-galang na miyembro ng Sangguniang Bayan na sina Konsehal William Vergel De Dios at Konsehal JP Solis, gayundin ang mga kinatawan mula sa Angat PNP, Angat BFP, at iba pang dedikadong kawani ng iba’t ibang tanggapan ng Pamahalaang Bayan ng Angat.

Isa sa mga tampok ng programa ay ang pagbibigay ng karangalan sa bayan ng Angat sa pamamagitan ng “Award of Excellence” na ipinagkaloob ng Regional Voluntary Blood Services Program. Ang pagkilalang ito ay patunay ng walang sawang pakikiisa ng ating bayan sa adbokasiya ng voluntary non-remunerated blood donation, na naglalayong magligtas ng buhay sa pamamagitan ng kusang-loob at walang kapalit na pagbibigay ng dugo. Sa pamumuno ng ating Municipal Health Officer, Dra. Guillerma Bartolome, patuloy na pinatutunayan ng Angat ang malasakit at pagiging handang tumulong sa kapwa, anumang oras at sa anumang paraan.

Pagkatapos ng seremonya, idinaos ang isang banal na misa bilang bahagi ng pasasalamat at pagpapalakas ng espirituwal na pagkakaisa ng komunidad. Pinangunahan ito ni Rev. Mons. Manuel Villaroman, na sa kanyang makabuluhang homilya ay binigyang-diin ang kahalagahan ng ating papel bilang mamamayan at bilang mga anak ng Diyos. Aniya, “Tayo ay bahagi ng mundo, at tayo ay bahagi rin ng kaharian ng Diyos. Nawa’y sa dalawang lipunang ito ay manatili tayong masunurin at tapat—una sa ating Panginoon, at gayundin sa mga namumuno sa atin—upang sama-samang makamtan ang kaayusan, kapayapaan, at pag-unlad.”