‘Community Risk Assessment,’ Inilunsad ng MDRRMO Angat sa mga Barangay ng Paltok at Niugan

Pormal nang inilunsad ng Municipal Disaster Risk Reduction and Management Office (MDRRMO) Angat ang pagsasagawa ng Community Risk Assessment (CRA) sa iba't ibang barangay noong Hulyo 6. Ito ay bilang bahagi pa rin ng pagpapatatag sa kahandaan ng buong bayan laban sa mga kalamidad.

Ang malawakang programa ay isinasagawa sa ilalim ng pamumuno ni Punong Bayan at DRRM Council Chairman Igg. Reynante "Jowar" S. Bautista at sa pangunguna ni MDRRM Officer G. Carlos R. Rivera Jr.

Unang nagtungo ang CRA Team ng departamento sa dalawang estratehikong barangay upang simulan ang mabusising pag-aaral sa mga posibleng banta ng sakuna sa kanilang lokalidad. Mainit namang tinanggap ang koponan ng mga lokal na opisyal sa pangunguna nina:

• Igg. Augusto Cruz (Punong Barangay ng Paltok) at ang kanyang Sangguniang Barangay

• Igg. Roberto Maximo (Punong Barangay ng Niugan) at ang kanyang Sangguniang Barangay

Ayon sa MDRRMO, ang pagsasagawa ng Community Risk Assessment ay isang kritikal na hakbang upang matukoy ang mga partikular na suliranin o bulnerableng lugar sa bawat barangay tuwing may darating na kalamidad gaya ng bagyo, baha, o lindol.

Sa pamamagitan ng direktang pakikipag-konsulta sa mga mamamayan, mas madaling makabubuo ng mga plano ang lokal na pamahalaan. Bukod dito, mas masisiguro na ang pondo ng bayan ay mailalaan sa mga tamang proyekto na tunay na makatutulong sa kaligtasan ng mga residente.

Ang aktibidad na ito ay sumasalamin sa paggunita ng bayan sa National Disaster Resilience Month na may temang “Naghahanda at Kumikilos tungo sa Panatag at Bagong Pilipinas.” Sa pamamagitan ng maagang pag-analisa sa mga panganib, patuloy na nagkakaisa ang pamahalaan at mamamayan ng Angat tungo sa isang ligtas at panatag na pamayanan.