Call 911: Emergency Hotline, Muling Pinaalalahanan ng Angat Police Station sa Publiko

Angat, Bulacan
Jul 10
1 min read

Upang mabilis na makatugon sa anumang sakuna, aksidente, o banta sa seguridad, muling nagpaalala ang Angat Municipal Police Station (MPS) sa publiko ukol sa kahalagahan ng paggamit ng 911 Emergency Hotline.

Ang 911 ay ang Unified Emergency Hotline na bukas 24 oras araw-araw upang magbigay ng mabilisang saklolo mula sa pulisya, BFP, medical responders, at MDRRMO.

MGA DAPAT TANDAAN KAPAG TUMATAWAG SA 911:

Manatiling Hinhin at Kalmado: Magsalita nang malinaw upang mabilis na maunawaan ng operator ang inyong sitwasyon.
Ibigay ang Tumpak na Lokasyon: Sabihin ang eksaktong kinalalagyan (Barangay, kalye, o pinakamalapit na landmark) upang agad na maipadala ang kinakailangang tulong.
Ipaliwanag ang Nangyari: Maikling ilahad kung anong uri ng emergency ang nagaganap (krimen, aksidente sa daan, sunog, o pangangailangang medikal).

PAALALA LABAN SA FAKE AT PRANK CALLS

Pinaalalahanan din ng Angat MPS ang lahat na ang Hotline 911 ay para lamang sa mga tunay na emergency. Ang pagtawag ng biro o prank calls ay mahigpit na pinagbabawal ng batas sapagkat ito ay nagdudulot ng abala at pwedeng makahadlang sa pagligtas ng buhay ng ibang mamamayan na tunay na nangangailangan ng saklolo.