Bayan ng Angat, Aktibong Nagsagawa ng Pre-Disaster Risk Assessment Bilang Masusing Paghahanda sa Paparating na Bagyong #EmongPH

Sa pangunguna ni Hon. Reynante "Jowar" S. Bautista, Ama ng Bayan ng Angat, muling ipinakita ng lokal na pamahalaan ang kanilang seryosong pagtugon sa kaligtasan at kapakanan ng mga mamamayan sa pamamagitan ng maagang pagsasagawa ng Pre-Disaster Risk Assessment (PDRA). Ang hakbang na ito ay bahagi ng malawakang paghahanda upang matiyak na ang buong komunidad ay handa at protektado sa pagdating ng malakas na bagyo, partikular ang paparating na Bagyong #EmongPH.

Pinangunahan ni G. Carlos R. Rivera Jr., Municipal Disaster Risk Reduction and Management Head (MGDH I), ang pagpupulong na nagbigay diin sa kahalagahan ng maagap na paghahanda at ang mga posibleng epekto ng bagyo sa iba't ibang sektor ng bayan.

Nagbahagi si G. Rivera ng mga mahahalagang datos at mga forecast mula sa mga awtoridad ukol sa lakas at landas ng bagyo, kasama ang mga rekomendasyon upang mabawasan ang pinsala at panganib.

Sa ilalim ng PDRA, tinalakay nang masinsinan ang prepositioning o maagang paglagay ng mga stockpiles sa mga designated evacuation centers. Sinigurado ni MSWD Head Menchie Bollas na sapat ang suplay ng pagkain, tubig, gamot, hygiene kits, at iba pang pangangailangan para sa mga posibleng evacuees upang maiwasan ang kakulangan sa oras ng sakuna. Mahalaga ang aspetong ito upang mapanatili ang kalusugan at kaginhawahan ng mga residente habang nasa pansamantalang tirahan.

Bukod dito, tiniyak ni G. Rivera na ang mga rescue tools and equipment ay nasa maayos na kondisyon at handa nang gamitin anumang oras. Ang buong Angat Rescue Team ay naka-standby rin upang agad na tumugon sa mga posibleng insidente, kabilang ang paglilikas, pagsagip, at pagtulong sa mga apektadong pamilya.

Ang isinagawang PDRA ay dinaluhan ng mga kinatawan mula sa iba’t ibang sangay ng lokal na pamahalaan na may mahalagang papel sa pagtugon sa kalamidad, kabilang ang:

• Municipal Social Welfare and Development Office (MSWD Angat), na nangunguna sa paghahatid ng mga serbisyong panlipunan at pangkalusugan sa mga evacuees,

• Municipal Environment and Natural Resources Office (MENRO Angat), na tumutok sa mga posibleng epekto ng kalamidad sa kalikasan at mga likas na yaman,

• Municipal Agriculture Office, na nangangalaga sa mga magsasaka at mga pananim laban sa pinsalang dulot ng bagyo,

• Municipal Health Office (Angat Rural Health Unit & Lying-In Clinic), na nagsiguro ng sapat na serbisyong pangkalusugan at panganganak para sa mga nangangailangan,

• Office of the Mayor (Municipal Government of Angat), na siyang sentro ng koordinasyon ng mga hakbang,

• Municipal Nutrition Action Office (Nutrisyon Angat), na patuloy na nagpapalaganap ng tamang nutrisyon sa panahon ng kalamidad,

• At iba pang mga tanggapan at ahensya na katuwang sa pagsugpo ng pinsala at pagbigay ng tulong sa bayan.

• 
  

Ang masusing paghahandang ito ay bahagi ng patuloy na pagsisikap ng Pamahalaang Bayan ng Angat na gawing mas matatag at handa ang buong komunidad laban sa anumang sakuna. Hinihikayat ang lahat ng mamamayan na makiisa sa mga programa at maging alerto sa mga abiso at paalala mula sa lokal na pamahalaan at mga kaukulang ahensya.

Para sa agarang tulong at suporta sa oras ng kalamidad, maaaring tumawag sa mga sumusunod na numero ng Angat Rescue Hotline:0923-926-3393 / 0917-710-5087

Manatiling ligtas, handa, at magkakaisa sa pagharap sa anumang hamon ng panahon.

#AsensoAtReporma#MDRRMOAngat#AngatRescueTeam#HandaLigtasAtPanatag#Kumikilos