Barangay Sulucan, Matagumpay na Nagsagawa ng Joint Barangay at KK Assembly

Isang makasaysayang pagtitipon ang naganap sa Barangay Sulucan nitong ika-22 ng Marso, 2026, matapos pagsamahin ang pwersa ng mga nakatatanda at kabataan para sa Barangay Assembly at Katipunan ng Kabataan (KK) General Assembly.

Ang nasabing ulat sa mamamayan ay pinangunahan ng Pamahalaang Barangay sa ilalim ng pamumuno ni Igg. Kapitan Richard "Eric" Cruz, katuwang ang Sangguniang Kabataan (SK) sa pangunguna ni SK Chairman Alex Cruz Hernandez. Layunin ng aktibidad na ito na maging bukas at tapat ang pamunuan sa mga nagawa at nakaplanong proyekto para sa buong komunidad.

Sa ginanap na asambliya, tinalakay ang mga mahahalagang isyu sa barangay, habang ang mga kabataan naman ay nagkaroon ng pagkakataong mailahad ang kanilang mga mungkahi para sa mga programang pangkabataan. Ang pagdalo ng maraming residente ay nagsilbing patunay ng aktibong pakikilahok ng mga taga-Sulucan sa lokal na pamamahala.

Taos-pusong nagpaabot ng pasasalamat sina Kapitan Eric Cruz at SK Chairman Alex Hernandez sa lahat ng mga dumalo, nakinig, at nakiisa. Ayon sa kanila, ang ganitong ugnayan ang susi upang mas lalong mapabilis ang pag-unlad at mapanatili ang kaayusan sa kanilang mahal na barangay.